Auður Daníelsdóttir tekin við starfi forstjóra Samkaupa
Auður Daníelsdóttir, forstjóri Dranga og Orkunnar, hefur jafnframt tekið við starfi forstjóra Samkaupa. Heiður Björk Friðbjörnsdóttir, sem gegnt hefur hlutverki staðgengils forstjóra síðustu mánuði, mun nú einblína á fyrra starf sem framkvæmdastjóri fjármála og upplýsingatækni Samkaupa.
Auður tók við starfi forstjóra Dranga í sumar, en Drangar er nýstofnað móðurfélag Samkaupa, Orkunnar og Lyfjavals. Hún hefur verið forstjóri Orkunnar síðustu þrjú ár og mun áfram sinna því starfi. Þar með leiðir hún umbreytingar í rekstri félaganna og skipan eigna hjá Dröngum.
Samruni Samkaupa og félaga á neytendamarkaði í eigu Dranga hefur gengið vel. Samkaup á öflugan og tryggan viðskiptavinahóp og markmið okkar er að styrkja stöðu fyrirtækisins enn frekar og efla þjónustu við viðskiptavini. Neytendamarkaðurinn er í stöðugri þróun, bæði hvað varðar stafrænar lausnir og aðra þjónustu til viðskiptavina. Við í Samkaupum hlökkum til að takast á við þær áskoranir, en stefna okkar er að veita einfalda og góða þjónustu þar sem upplifun viðskiptavina er í fyrirrúmi.
